.कृषि क्षेत्रको उत्पादन तथा उत्पादकत्व बढाउन उपयुक्त प्रविधि कृषक समक्ष पुन्याउनको लागि तालिम एक सशक्त माध्यम हो । यहि कुरालाई हृदयाङ्गम गरी तत्कालीन श्री ५ को सरकारको मिति २०४४ मार्ग २४ को निर्णयले तत्कालीन कृषि तालिम तथा प्रसार शाखावाट अलग्याई केन्द्रीय कृषि तालिम केन्द्र र पाँच विकास क्षेत्रका तराई र पहाडमा १/१ गरी जम्मा १० वटा क्षेत्रीय कृषि तालिम केन्द्रहरु स्थापना गरिएका थिए । आ.व. २०४६/०४७ मा क्षेत्रीय कृषि तालिम केन्द्र पहाडी क्षेत्र तराईमा गभिने क्रममा क्षेत्रीय कृषि तालिम केन्द्र पहाडी क्षेत्र, सुर्खेत पनि क्षेत्रीय कृषि तालिम केन्द्र खजुरा, बाँकेमा गाभियो र यस उप्रान्त मध्यपश्चिमाञ्चल क्षेत्रका तालिम कार्यक्रम क्षेत्रिय कृषि तालिम केन्द्र बाँकेबाट संचालनमा रहेका थिए । आ.व. ०७५।७६ देखि संघीय संरचना अन्तर्गत, भूमि व्यवस्था कृषि तथा सहकारी मन्त्रालय कर्णाली प्रदेशको कृषि विकास निर्देशनालय मातहत कृषि व्यवसाय प्रवर्द्धन सहयोग तथा तालिम केन्द्रका रुपमा स्थापना भइ पुनः २०७६ सालमा कर्णाली प्रदेश सरकारले O&M गरी भूमि व्यवस्था, कृषि तथा सहकारी मन्त्रालय, कर्णाली प्रदेशको मातहतमा रहने गरी साविकका पशुसेवा तालिम केन्द्र र कृषि व्यवसाय प्रवर्द्धन सहयोग तथा तालिम केन्द्रलाइ एकिकृत गर्दै हालको कृषि तथा पशुपन्छी व्यवसाय प्रवर्द्धन प्रशिक्षण केन्द्रको समुद्घाटन मिति २०७६।०७।१७ गतेका दिन भूमि व्यवस्था, कृषि तथा सहकारी मन्त्रालय, कर्णाली प्रदेश, सुर्खेतका श्रीमान सचिव श्री राजेन्द्र प्रसाद भारी ज्युको प्रमुख आतिथ्यतामा सम्पन्न गरि काम गर्दै आएको छ ।

कृषि तथा पशुपन्छी व्यवसाय प्रवर्द्धन प्रशिक्षण केन्द्र, सुर्खेत जिल्लाको सदरमुकाम वीरेन्द्रनगर नगरपालिका वडा नं ५ जानकी टोलको गणेशचोक नजिक अवस्थित छ । यस कृषि तथा पशुपन्छी व्यवसाय प्रवर्द्धन प्रशिक्षण केन्द्रको निकटमा भूमि व्यवस्था कृषि तथा सहकारी मन्त्रालय कर्णाली प्रदेश, कृषि विकास निर्देशनालय लगायत एकीकृत कृषि प्रयोगशाला, प्रधानमन्त्री कृषि आधुनिकीकरण परियोजना, जोन कार्यान्वयन ईकाईको कार्यालय, कृषि क्षेत्र विकास कार्यक्रम र अन्य कृषि सम्बन्धी काम गर्ने गैह्रसरकारी संघसंस्थाहरु पनि रहेकाले तालिम संचालनका लागि पूर्वाधार र स्रोत व्यक्तिको उपलब्धता सहज रहेको छ ।